महाराष्ट्र पोलीस भरती प्रक्रियेत सहभागी होणाऱ्या महिला उमेदवारांसाठी राज्य सरकारने महत्त्वाचा निर्णय घेतला आहे. शारीरिक चाचणीच्या दिवशी मासिक पाळी सुरू असल्यास संबंधित महिला उमेदवारांना चाचणीसाठी मुदतवाढ दिली जाणार आहे. त्यामुळे मासिक पाळीमुळे कोणत्याही महिला उमेदवाराची पोलीस भरतीची संधी हुकणार नाही. सरकारच्या या निर्णयामुळे महिला उमेदवारांना मोठा दिलासा मिळाला असून भरती प्रक्रियेत महिलांसाठी अधिक संवेदनशील आणि अनुकूल वातावरण निर्माण होण्यास मदत होणार आहे.